أكاديمية الهدى الماسية للشعر والأدب

قصيدة رثاء لأبنتي حنين الله يرحمها ويرحم امواتكم اجمعين
حنين
قصيدة نبطية للشاعر والنحات قصي ابو سماح
البحر نبطي مفاعيلن مفاعيلن مفاعيلن
حنين
يمر طيفك حسومي عالقلب عابور ْ
مثل ريح الحسوم اتهد اركاني
تجي يومن عالقلب تغيب شهور
تُمر مر الغضا وتهيّج اشجاني
ويبقى هالقلب كل السنه مقهور
يصيح من الوجد ياريًت ماجاني
وكل ماريحك الهبلة تجي وتزور
دليلي تصلج بأعماق شرياني
تحطم كل نخل عمري تُمر مرور
وريحك ياحسومي إتكسر اغصاني
ونارك بالحنايا ياحطب تنور
جفا وشوق ولظى وتثور نيراني
يول مركب غرامي تايهن ببحور
على موجك جوى وشلون تنساني
يسالي والقلب مشعل مناره أبّور
يسالي بالحلم اعبر عَلَي ثاني
وطيفك ياولف شمس الضحى والنور
وطيفك ياولف والله رحماني
يسالي بالعقل يخلع ألف فاكور
والف هدواسن يهـدوس بوجداني
زماني الما نصفني وسكنك بقبور
يلولا عالقبر وياك ودّاني
عيوني كالسحابه والدمع خابور
وريحك ياحسومي تعصف عليَّ آني
صرت ريختر لآذارك وناطور
على شط الهوى والشوق وحداني
حنيني والهوى والخاطر المكسور
يلاطمني بوجد وسواس شيطاني
اتلفنلك يجاوبني الرقم محظور
بعثتلك مع الخطار عنواني
زرعتلك عالقبر ريحان وزهور
صفو تحت الثرى يزهور خلاني
على جمر الوجد شعلتلك بخور
حبيبي ريحتك بخور رباني
وسلامتكم
شعر الشاعر والنحات قصي صالح ابو سماح
…….