أكاديمية الهدى الماسية للشعر والأدب

…… الوعد ……

يا خالف الوعد ليه تخلف وما بتوفيش
دا القلب مكسور وحالف ع العهود ليعيش
وكل لحظة بقول ……. بكرة هيجي أكيد
الجرح بيزيد …….. وبستني ولا بتجيش
وعدك دا دين والدين لابد من …. سده
والبعد باب مفتوح واجب عليك …. رده
العمر بيعدي ……. وقطر الحياة مفارق
ولا ما هوش فارق ….. معاك سنين عدوا
اسمع يا ليل شكوتي …….. وصلها للغالي
يمكن يحن ف يوم .. ويعود ويصفي لي
والله ما دقت النوم من يوم ما غاب عني
والعمر راح مني …… ولا شئ بيحلي لي
بضحك وبتكلم …… وقلبي بيبكي بزيادة
والجرح فيه معلم …. وكاتم صوته بزيادة
وخلاص تعب قلبي ومش قادرة علي الكتمان
وغصب عني بان …….. عليا الهم بزيادة
لو كان يهمك صحيح أمري حبيبي… عود
صبرت كتير لكن صبري أكيد له حدود
أخاف تجيني يوم تلاقي القلب مش رايق
ويقول ما نيش طايق ووصلنا لطريق مسدود
إياك تخالف وعودك بحجة النسيان
عمر الأصيل ما يخون عهده ولا يتخان
و كلام من الأخر …. وكلمة حق متقالة
الدنيا سقالة وفيها اللي يصون يتصان
………. بقلمي : محاسن مرضي السيد