أكاديمية الهدى الماسية للشعر والأدب

(ماكنش العشم )
ماكنش والله العشم
تكدّبوا اللى إنظلم
وتصدّقوا الظالم
واللى ماداقشي الألم
إزاى هيبقى حكم
ويرد فى مظالم
أنا عشت بينكوا سنين
وكُلّكم عارفين
اللى ظلم كان مين
وبدّل الأحوال
عملتوا مش شايفين
ولا كُنتوا يوم سامعين
وحِلفتوا ألف يمين
الحق راح يتقال
لا حق يوم قُلتوه
ولا اليمين صُنتوه
والعدل صار عايم
صحيح ماكنش العشم
تكدّبوا اللى إنظلم
وتصدّقوا الظالم

عشت الحياه مظلوم
على مين هجيب اللوم
ع اللى ظلم أو خان
بكره هييجى الدور
والكل يبات مكسور
ويدوق من الأحزان
واللى جرح بإيديه
ماطمرش خيرى فيه
زى ما هونت عليه
هو كمان هايهون
أنا مش هسامح تاني
مهما هيترجاني
لو شفته يوم بيعاني
أو حتى إيه هيكون
يا رب وحدك شايف
أنا مش ضعيف ولا خايف
وأنت اللى وحدك عالم
صحيح ما كنش العشم
تكدّبوا اللى أنظلم
وتصدّقوا الظالم

بقلمي عبدالحميد وهبه