أكاديمية الهدى الماسية للشعر والأدب

( صيّاد الفكرة )
سارح في بلادِ الله الواسعة وفي الملكوت
مش شايل هم الدنيا أكيد طبعاً ولا هم الموت
والعمر زي ما عدى أكيد على ناس قبلينا
لازم وضروي أكيد بينا طبعاً هيفوت
فبحاول إني أشوف دايماً وأصطاد أفكار
من صورة عدت أو كلمة مرّت فى حوار
أوضِحكة عالية بسمعها أنا وقت هزار
أو دمعة حزينة في عين واحد والصوت مكبوت
سارح في بلادِ الله الواسعة وفي الملكوت

بصطاد الفكرة ساعات دايماً من شخص حزين
مش عارف يهرب م الدنيا ويروح على فين
أو شخص الدنيا بتضحكلُه دايماً على طول
ولا حاسس طبعاً بحياة الناس التانيين
وساعات بصطادها وأنا ماشي في طريق ممنوع
واقف في النص باقيت محتار مش لاقي رجوع
من دمعة أم بتبكي أكيد وبتِنعي ضناها
من صرخة طفل وبيعيط من كتر الجوع

وساعات الفكرة بتجيني وأنا بين الناس
من جُملة حد يقولهالي بِرقة وإحساس
أو ألمح نظرة في عين واحد باصص لحبيبته
بعيون مليانة كلام مغزاه صِدق وإخلاص
وساعات الفكرة تصحيني من عز منامي
وعشان تترجم بتخيّل أشياء قدامي
وبعيش وياها أحداث مش عارف أعيشها
ومعاها بسرح بخيالي وبعشق أحلامي

بقلمي عبدالحميد وهبه
12/6/2023