أكاديمية الهدى الماسية للشعر والأدب

(دهب قشرة )
ومادام قِدرت خلاص تبيع
وطِلعت بجد يا صاحبي وضيع
فياريت من تاني بلاش تسأل
وتقفّل على كل المواضيع
لا ندم هَيفيد ولا كُتر كلام
ولا حتى عِتاب ولا أى ملام
لا هأقولّك بِعت يا صاحبي بكام
ولا إيه اللي أخدته مُقابل البيع
وما دام طلعت يا صاحبي وضيع

بقى جالك قلب ياصاحبي تخون
العيش والملح مع العِشرة
ويوماتي بلون بقى غير اللون
عن جد طِلعت دهب قشرة
إزاي بتبيع اللي ما باعك
ولا يوم كان يرضى بأواجعك
مع إنّه أكيد عارف إنك
الزيف والكدب كانوا طِباعك

وما دام مش فارقة معاك كِتير
ولا كُنت في مرة عليك بَصعب
فَ البُعد يا صاحبي أكيد كان خير
وخسارتك يعني أكبر مكسب
وإن جيتني في يوم بتقول ندمان
وسامحني يا صاحبي أنا الغلطان
راح أقولّك يعني خلاص قفلت
مابقاش جوايا لِصُحبة مكان

بقلمي عبدالحميد وهبه