أكاديمية الهدى الماسية للشعر والأدب

@تعليمنافي أجازة
‏🎶🎶🎶🎶
‏تعليمنا في أجازة
و ضميرنا فى التلاجة
وعيال طباعها سادة
‏. والمر بقي بزيادة
الأهل بقوا تايهين
ورا الغلط ماشيين
وفاكرينها قال شطارة
إلحق خد مكان يكون
لك آخر وجاهة
حتي لو كان شمال
و مش مهم بكام
دي مافيا وإتأصلت
جوة العقول سيطرت
إدفع و خد شهادة من غير قيم يا سادة
إكبر خليك طبيب
و اتعلم في الغلابة
ويموتوا بالسلامة
البلد زحمة زيادة
وإنت خليك مهندس
وإتباهى بالشياكة
وبدل ما تبني وتعلي
‏ إهدم إنت السعادة
‏وغيره يبقي ظابط
‏ آخره لبس البيادة
‏يمشي هناك يعلم
‏ينضرب له ميت تحية
‏ والعظمة ياخدها غية
‏ويلطش في الخلايق
‏ وإنت خليك مدرس
‏ بدماغ متفرمطة
‏من كل الإبداعات
‏ ومفيهاش معلومات
‏يا خسارة وميت ندامة علي أجمل رسالة
‏لما صاحبها عالة
‏ ع الفكر و بجهالة
‏ولا عاد فيها معلم
‏ نقف له إحترام
‏وتبجيله حرام
‏ م المبادئ متلخبطة
‏وحضارة عشرين ألف سنة
‏ نسناها من سنة
من يوم ما ولدنا أخدوا الغش عادة
يارب عليك العوض
‏ في أخلاق إتدهورت
وفي دنيا راجعة ورا
‏ و الغرب إتقدمت
وشبابنا منا تاه
‏وشاب منه صباه
‏ و أخلاقه إتغيرت
‏عاوزين صحوة ضمير وقلوب متجمعين
‏علي حب الخير للغير
‏ ف المال مش طمعانين
‏ مناهم هو النجاة لكل خلق الله
‏وحياة تكون كريمة
‏ من غير شعارات مميتة
‏يارب صحوة ضمير يارب صحوة ضمير
….. ‏بقلم…..أميرة الغرباوي……
‏🎶🎶🎶🎶🎶