أكاديمية الهدى الماسية للشعر والأدب

إرجع تاني
💤💤💤💤💤
( قولتله عايش ؟؟؟ )
  قال  متعايش !!
أحسن عايش ..
        مش لايقة لي أبداً خالص
واعيش إزاي
   وإنتي حبيبتي.. مش مرسايا
أنا كان حلمي  …
أكون لك فارس..
أيوه مجاش في خيالك أبدا
يحمي قلاعك من عزالك أو حسادك
أيوه تكون جناحاتي الطاهره
   بجريد أخضر عرض سماكي
لاجل ما تحمي النور في جبينك
ولا أي مغامر أو كان طامع ولا مبارز
يقدر يقطف مرة ثمارك
   و اما يجف  النبض في دمي
ألقى أنا ،،مددي ،، في شهد رضابك
شوفتك موجة.. بتثور ..تعلى
      ……وساعات تغضب
بس في حضن الجبل العالي
ترجع تهدى .. بس تلاقي
حنان من نبع  الحب الصافي
يا سنين عمري
يا يومي الحلو اللي معشتوش
حلمي اللي انا
      باتمني أشوفه و ماحلمتوش
          قلب وكان بيحن عليا
           وانا بغبائي مارحمتوش
راح اكون نقطة ..
        بره محيط الدايرة المغلق
      دايرة تدور يا ملاكي بتوسع
        وأنا جواها وريد متقطع
          أيوه صريع الصبر المر المرهق جدا
كنت  شموع النفق المظلم
……..     بس هناك سراديب بتفرع
صبح الضي لهيب وبيحرق
آه يا فتيل الشمع الدايب
يا اللي دموعك كات راسمالك
يا اللي خيوط الصبح الناعمة
سرقت ليلك ..
       حتي ما باقي الضوء الخافت
شوفتي ف يوم الفهد العاشق
    …عاشر هدهد وسابوه عايش
ٱه يا جناح الهدهد روح واتهني
..عيش بوليفك… كده واتمني
بكرة هيجي
   ومعاه سعدي وحور الجنة
ويمكن  جايز  هيدوب جسدي
و اكون المغرم،،،
ويبقى ترابي ..
معجون مني بلون الحنة
  لأجل تحني في نور الشمعة
  تسد الباقي  ما بيني وبينها
بس انا عايش
…….     ايوه انا عايش
عايش زي الضوء والنجمة ،
براه يعكس عكس الجسم المظلم جدا
جسمي العايش جوة ستاير حزنه الدايم
ساب علي باب الدايرة
قصايد عشق لطير ولهان محتاجلك
….ساب النسمة تلامس
خد العمر الباكي من الحرمان
و نورك فيا
ساب الدفتر
كان مليان بورق بهتان.. لأ مش باين
أصل الحبر ده كان مصنوع بدموع إنسان
محتاج لوليف ساعة الخوف يسقيني أمان
جف الحبر و تحت الرمش داريت في دموعي
      بس الرمش خلاص تاه مني وضاع يا زماني
هو العمر دا فيه كام عمر
عشان تخاصمنا الراحة و اقولك
                                 …….إرجع تاني.
         💤💤💤💤💤💤
  ✍️بقلمي ✍️ أميرة الغرباوي ✍️