حاول تعيش
💤💤💤💤💤
علشان تعيش..
لازم تطاطي للرياح الغاضبة
واقف لي ليه فوق ع الهوا
ساند دراعك في الفراغ المنتهي..
راكن بتقلك ع الخلا
دا خيوط كلامك.
ياابني كانت في الهوا
متهلهلة .ومهطلة ..ومسربة
عاوز تقول ..واللا تصيح
واللا هاتصبح نجم..
في قلب الليالي الحالكة
ياعم روح ..غطي الكتاف ..
غطي الجناب
م البرد لو قارص ..
و خوخ جوه جتت حضرتك
من بدري قوم..
سِد الجحور
اليابسة ..و العابسة .. و الغائرة
قبل الفحيح ما يعلى ويبقى ..
أنغام مؤكدة ،
سِد كمان كل البطون..
اللي ابتدت
تصبح خلايا ممششة ..ومعفنة..
من أكل أسراب النسور الحية
أو حتي بقايا الميتة
تقدر تقول للغولة إيه خلى عنيك
بنار كده
عشان تعيش..
لازم تطاطي للرياح الغاضبة
سَرِجْ حُصانك وامسكه بإيديك..
و هدي كبوته
وابعد ديدان الشر لاجل تتوه
و تبعد تاني عن حدوته
خليك يا بغل الضلمه ماشي بقوتك
أحسن قرود الحي..
ما تركب في ليله جبهتك
شوفت الفراخ..
كانت مطيعة..
آخرها تنتج في الولد
صبحت ديوك ..
بتصيح علي جور الأسد
طب قولي مين غيرها هنا..
كان كل ليلة حب ها يهدهد
و يحضن في الولد..
طب مين هايحمي ويرقي ..
زهر الحب م العين و الحسد
طب مين هيغزل في حبال ..
صبحت قوية من مسد
فاتح لي صدرك للرياح.. قال تِحَصَنَٓك
رغم الهشاشة الواضحه..
في العضم اللي فاقد شكله
من يوم ما اتولد
ياعم فوق.. هات فولتارين
واعمل مساج علي ركبتك
هات زيت حيتان..
و غزاء ملكات المملكة
وحبوب لقاح
علشان تعيد من تاني هيئة بـَنيتك
أو روح ونام ..شد اللحاف
وغطي حلمك ..
وخاف عليه مع سِكتك
علشان تعيش..
لازم تطاطي من مساوئ علتك
خايف جبان..
معصوب ..
و فيك مليون لسان
عايش هوان من غير حنان
… والفكرة فيك متلجمة
مرعوب يشوفك يوم رصيف
وبتستخبي جنب حيط
طب قولي قبلة يا عبيط
فين هو حتي الحيط..
عشان تتداري فيه
……و تداري منك سوءتك
دلدل كمان..
في ودان سباع المعمعه
في مرارة الذل اللي واضح..
والهوان والمرمطة
اوعي تعافر يوم.. تشاكس..
أو تكون دايم معادي
للأيادي البيضة..
…. ( المزيفة )
ماراح زمانك يا أسد و فاني
وراح عهد الزئير
وبترنا عنك جرأتك
ونشفت من كل الكرامة
و حتي فضيت جعبتك
روح استعين.. بالفار حويط. …
.. لون الطريق .. ويكون سريع
هات منه حبة من خيوط الليل
عشان ..
تستر بقايا جرتك
عاوز تعيش
طب ليه تعيش
وإنت اللي عارف آخرتك
لما رضيت ..
في يوم تطاطي للرياح الغاضبة
〰️〰️〰️〰️〰️〰️〰️
🤔بقلمي ✍️ أميرة الغرباوي 🤔
أكاديمية الهدى الماسية للشعر والأدب
أكاديمية الهدى الماسية للشعر والأدب
أكاديمية الهدى الماسية للشعر والأدب 
أضف تعليق