أكاديمية الهدى الماسية للشعر والأدب

وأد البراءة
  💤💤💤💤💤
   بدء النهاية المُحكمة
      قتل البراءة المُلهمة
     بأيادي طايشة مجرمة
  صياد حويط …. عامل عبيط
    قاعد بعيد.. وعيون حديد..
     داخلة حدود المملكة
وهي دى،،
     أصل الحوار و المظلمة
مش مظلمة ..
لأ مشنقة حب السنين المُهْدَرة
لابسة جونيله..
فيهاشكل غصون غريبه..مشجرة
حاطة فيونكة ..
حاضنة لسه في الشعور و ملونة
وشراب بكلفة
           شراب بلون كل الكعوب
اللي ما زالت
نارها قايده مدممة
بين الغصون دي فراشة  حرة معطرة
شايفة الزهور من كل لون
والا العطور بتفوح ..تطير
              تروي القلوب الطاهرة
تاخد في الشهيق …..  يخرج زفير
مليان عبير ..يعمي العيون الآثمة
بس الحياة مسرح كبير
فيه المشاهد ألف حاجه هاتقهرك
رُفع الستار ،،،
خدي  توبي مني ….. الضي أخصر.        
                 والحرير السندسي
يللا البسي واتدلعي  
                     خطوة كمان اتدللي
وامشي كده و اتمختري
بين الخانات.. هاتي الحاجات
وإن كان صاجات ،، وإنسي إللي فات
راح تبقي ماركة مسجلة
من غير جونلة…  ولا فيونكة معطره
   ولا حتي كلفة بيضة  واضحه  مزهرة
فكي الضفاير وتعالي جَاري..
عشان تجاري في الصبايا اللامعة
بكرة  هتبقي يا حلوة مطلب عالمي
قومي ادفني القلب اللي لسة ..
باقي فيه طيف الدفا
وهتكسبي إذا كان جنيه أو كان دولار
    و اللمة خايبة مزيفة
وإبقي أوصلي ولا ألضمي أو رقعي
عهد البراءة بالكفن ،
إتجهزي…وإتغسلي….إعمي العيون
باللون معفر بالسيجار
  داخل ضماير كلها مستنسخة
وكمان مميتة و معدمة
      إنتي إدفني كل إللي باقي م الخجل
وعن الصغاير يا حبيبتي اترفعي

،،صياد،، ……..،،وشبكة،،
بخيط مزهر ويا خيط أخضر..
فرايحي..فسدقي
في الصنعة حرفة ..بدون حدود
والصيد غزالة فِرعة  أيوه
و السلالة شركسي
فستان زفاف من غير زفاف..
و لا فيه دفوف
ولا حد يدفع مهرها ..
غُرزة… و…..غُرزة
       وجوه ألف مغارة عاتمة ..
بدون مدارها اللولبي
شبكة و جواها شبك
شبكة حرامي ..أو مرائي ..
                    مخاوي.. تايه.. أجنبي
فيه م الغزالة كتير يا حلوة في الوبا
انتي اسكري …إنتي إغمزي…
إنتي أرقصي واتغنجي واتدلعي
انتي تعالي علي الكراسي واسحبي
يللا اسلبي فكر العبيط الدنيوي
!! فجأة !!  خلاص
أصبحتي غارزة..
في ألف بير م المعمعة….
والمردغة…. والمفرمة
دهسوا  براءتك ،،   في الضلوع المنهكة    
و وحوش  بتنهش لسه
      في بكر الأيادي الناعمة ..الطاهرة
فاتبدلت.. واتغيرت.. واتحولت
شجرة و جفت جوه أيام الشتا
برواز قديم..
في قلب حيطة محنطة
وف قلب معرض للضحايا..
والوجوه اللي ما زالت
في طريقها مُقَنَعة
نزل الستار…
علي كل دمعه غليظة.. باهته.. محجرة
وسواقي دايرة في ترعة ناشفة ضيقة
و ادي النتيجة …
        الزرعة دبلانة  و مُرة..مدودة
والطور عليل من غير دليل
ولا طيف خليل
ولا حد قادر يطفي جرحه و علته
مات الضمير والخوف أسير
فارد  قلاعه
خيم علي وشوش البنات
    والوحش زير مروي بخمرة جرحهم
و فجأه تاني من جديد..
صياد جديد. ..  واقف بعيد
     عمال يكيد ..
علشان يصيد
بالمكر..غزلان البلد
                  آه يا بلد
       💤💤💤💤💤💤
😢بقلمي ✍️ أميرة الغرباوي 😢