أكاديمية الهدى الماسية للشعر والأدب

اسمحيلي تاني أسألك..
ماتقولي إنت فين و مين !؟؟؟
انا كنت شايفك من سنين
نفس الملامح.. و العنيين
أيوه هناك حبة رتوش..
حبة خدوش
حبة ندوب …
حبة ملامح بهتانيين
حبة سكك متلخبطين..
متفرقين
        تاه مهدهم ويا الحنين
انا كنت عارفك!!!! ايوه عارفك..
من سنين
إنت الأنين….
إنت اللي عايشة في الوتين
       بين الضلوع العصيانين …..
أنا أيوه عارفك.. من زمان
زي الحصان اللي جمح
رافض كلام الشمتانين
    رفض التخفي وسط عبيان القدر
رافض تحسر ع اللي كان
         بتقول أموت
ولا يوم أجرب في الهوان
عارفك سفينة ..
وسط أمواج الحياه
عارفك سفينة بميت شراع
قرصانها كان
قد التحدي للشجون المجموعين
     يا أصل دوامة    الرياح
يا اللي انت كنت لكل ناسك ..
طوق نجاه ….
           يا االي انت كنت الند
لشطوط البحار
لابس في توبك سندسي …
         معظم خيوطه الطاهره
من شمس النهار
شعرك جدايل..مدهمه…..
      شاربة الأمان
من كحلة الليل الحزين …
و كأنه دايما نور صباح ،،
خارج بيحبي بين زهور الميتين
عارفك رياح
واقف يحطم لسه قضبان الطغاه
فارد جناحه وقال اطير
                ماعرفشي كلمة مستحيل
بس الجناح دا…… كان جريح
مع عزفه للناي الدبيح
يطلي الرحايا العصيانيين
          المتصنعين بقلوب بشر
واهي دايره عجلات الطاحون
تطحن في  دوامة السنين…..
المليانيين بدموع كتير…..
متحجرين عاملين غشاوة ع العنيين
العطشانيين …….البردانيين
المحتاجين
خيمة خيوطها مشدودين
و الحبل موصول بالوتين…
            و بيجري فيه نبض الحياه
أو نبض روح حارس أمين…..
                  وتكوني دايما نور سماه
..أنا قلبي شايفك …من زمان
     حافظ ملامحك  من سنين..
           ✨✨✨✨✨
  💫بقلمي ✍️ أميرة الغرباوي 💫