أكاديمية الهدى الماسية للشعر والأدب

( فترة وتعدّي )
يعدى إزاي علينا يوم
بدون ما أنا وأنتِ نتكلم
يجيني إزاي في بُعدِك نوم
وأنا طول وقتي بتألم

أكيد اليوم ده مش محسوب
لا من عمري ولا عمرَك
لو أعرف بس أيه مطلوب
أنفّذ بس عشان خاطرَك

حبيبتي اللى تاعبني أكيد
مانيش ع البُعد متعّود
وخايف البُعد بينّا يزيد
أو إنه تاني يتجدد

أكيد هنجدد المواعيد
فى أقرب فرصة ونحدّد
أكيد بكره حبيبي أكيد
مسير اليوم ده يتعوّض

كلامِك حلو بيطمّن
وبيحسسني بالقوة
وبيفرّح وبيسكّن
حنين في القلب من جوه

أكيد كان بُعدى مش مقصود
وفترة حبيبى وتعدّي
ويوم مايكون ما بينّا حدود
ده لا بقصدك ولا بقصدي

أغنية دويتّو
بقلمي عبدالحميد وهبه